Misissueqqissaarneq: Nuup allilerneqarnissaa annertuumik piorsaassaaqinerisaassaaq

Nuup illoqarfiittut ineriartortinnissaa aammalu nutaamik illoqarfiup immikkoortortaanik pilersitsinissaq illoqarfiup pingaarnersaani aammalu Kalaallit Nunaanni maannamut siullerpaamik inerisaassaaq.

Illoqarfiup immikkoortuata nutaap Siorarsíorfiup, inissiat, sullorsuup, atuarfiit, atuareernerup kingorna ornittakkat aammalu ukioqatigiiaangitsunut meeqqriviit pilersinneqarnissaat, aatsaat tassa Kalaallit Nunaanni inerisaanerujussuussaaq. 1979imiilli Kalaallit Nunaanni ineriartorneq agguaqatigiissillugu ukiumut 1 procentit missaanniippoq.

Illoqarfimmik ineriartortitsinissamut pilersaarummut nutaamut atatillugu inuiaqatigiit aningaasaqarnerisa naatsorsorneqarnerat misissueqqissaarfigineqarnerallu Kalaallit Nunaanni ingerlanneqarsimasut annertunerpaartaraat. Misissueqqissaarnerup takutippaa, ineriartorneq ukiut tamaasa ukiuni 40ni tulliuttuni minnerpaamik 2 procentiussasut.

“Nuummut nuttarnerujussuaq aammalu illoqarfiit pingaarnersaatut periusissiami takorluukkat ilutigalugit piffissap ilaanni inissiaqarfimmut nutaamut inissianullu amerlanerusunut qanorluunniit sullorsualiortariaqartussaasussaavugut. Atuarfinnik ukioqatigiiaanngitsunullu meeqqeriviit pilersinneqarnissaat utaqqissunneqarsinnaanngillat, taamaammat suliniut taama annertutigisoq pisariaqarluinnarpoq aammalu Nuuk Kalaallit Nunaallu ineriartortinnissannut akisussaassuseqarnerussalluni, taama oqarpoq borgmesteri Asii Chemnitz Narup (IA).

Borgmesterip tullianit Justus Hansenimit (D) tapersersorneqarpoq:

”Kommunalbestyrelse ukiut tamarluinnaasa pingaarnersiuinermini kommunip illoqarfinni nunaqarfinnilu sanaartugassartut aningaasaliissutinut minnerpaamik 200 millionit koruunit missingersuutitigut qulakkeerneqartarpoq. Kommunimut ineriartortitseqataasarpoq, kisiannili suliniummut taama annertutitgisumut naammanngilaq. Maannakkut piaartumik ataasiakalaaralutalu Nuup ineriartortinnissaanut sukkatsissarsinnaanngussavarput. Taamaalisukkut illoqarfiit pingaarnersaasa suliniummut aningaasaliinissamut periuseq aqqutigalugu ineriartortinneqarnerata nunami tamarmi ineriartortitsinermik pilersitsissammat pitsaavoq.”

Ane Egede Mathæussen (S), Kommuneqarfik Sermersuumi borgmesterip tulliata aappaata ineriartortitsinissap Kalaallit Nunaannut iluaqutaasussaaneranut pitsaaqutissatut isigaa:

”Illoqarfimmik ineriartortitsinissaq ima sakkortutigisumik ineriartuutaatigissaaq, illoqarfiit nunallu amerlanersaasa sinnattoriinnarsinnaassallugu. Ukiuni 40ni tulliuttuni ineriartorneq nunatta karsianut aningaasanik amerlanerusunik isertitsissaaq taamaalillunilu nuna tamarmi kivinneqassalluni.”

Aningaasaqarnermut Akileraartarnermullu Naalakkersuisoqarfimmit periuseq suliarineqartoq tunuliaqutaralugu, Nunap tamarmi aningaasaqarniarneqarneratigut misissueqqissaarneq revisionsfirmaet EYimit suliarineqarpoq.

Qanoq ilaatigut inissiat 1600it, ukioqatigiinngitsunut meeqqeriviit qulit, atuareernerup kingorna paaqqinnittarfiit pingasut (1.-3.-klassinoortut), atuarfiit marluk kiisalu atuarfimmik allilliineq sanaartorneqarnerisigut inuiaqatigiit aningaasaqarniarnerisigut ukiuni 40ni tulliuttuni kinguneqassanersoq misissueqqissaarnermi naatsorsorneqarpoq.

Msissueqqissaarnermi ineriartornerup ilai assigiinngitsut naleqartinneqarput. Assersuutigalugu atuarfiit pitsaanerusut naatsorsuinermi iluanaarutaanerussasut ersersinneqarpoq, paarlattuanik illoqarfimmi anginerusumi angallannermut piffissaq sivisunerulissalluni.

Misissueqqissaarinerup suliarineqarnera ukiup affaanik sivisussuseqarpoq, piffissalli atorneqarluartoq Kommuneqarfik Sermersuumi borgmesteri isumaqarpoq:

“Uagut Kommunalbestyrelsemi suliniutip inuiaqatigiinnut kingunissai pingaartilluinnarsimavagut. Taama annertutigisumi aalajangiinnginnitsinni qulakkeerinneqqaarusussimavugut, tassami arlaannattaluunniit meeqqavut ernuttavulluunniit taama annertutigisumik akiitsoqarnissaat kissaatiginngilaa.” taama Asii Chemnitz Narup (IA) oqarpoq.