Sermersuup oqaluttuarisaanerani suliniut pingaaruteqarnerpaaq

Partiinit assigiinngitsuneersut Kommunalbestyrelsemi kattullutik, Kommuneqarfik Sermersuup oqaluttuassartaani suliniut annerpaaq suleqatigiissutigaat.

Inissiat, atuarfiit, meeqqeriviit meeraaqqerivittallit, atuareernerup kingorna ornittakkat nutaat sullorsuarlu nutaaq suliniutip nutaap Nuummi ineriartortitsisussap ilagiinnarpai. Tamatuminnga aningaasaqarnikkut siuariartorneq pissaaq, nunamut tamakkerlugu iluaqutaasussaq inuiaqatigiinnullu sunniutaasussaq, najukkami ilinniartunut sungiusarfissarpassuarnik, suliffissarpassuarnik tunisassiornerpassuarnillu pilersitsisussaq. Ataatsimut isigalugu suliniut Kalaallit Nunaanni ukiuni 40-ni tulliuttuni aningaasaqarnikkut ineriartortitsissaaq. Taamaammat Kommunalbestyrelse ataatsimoorussamik partiit suleqatigiillutik peqatigiilerput.

“Kalaallit Nunaannut, Kommuneqarfik Sermersuumut aammalu Nuummut suliniut oqaluttuarisaanikkut suliniutaavoq,” borgmesterip tullia siulleq Justus Hansen (D) taama oqarpoq nangeqqillunilu:

“Kommuneqarfik Sermersuup 2009-mi kommunerujussuanngortinneqarmalli taama pingaaruteqartigisumik suliniuteqartoqarnikuunngilaq. Takorluukkat anngajaat piviusunngortissagutsigit, taava ima angusaqarusussuseqartigissaagut, allaat maannamut takuneqanngisaannartumik suliniuteqarnissatsinnut sapiissuseqartariaqarluta – qanorluunniit parteeqaraluarutta.”

Kommuneqarfik Sermersuumi Kommunalbestyrelsemi Inuit Ataqatigiit, Siumut, Demokraatit aamma Atassummeersut Nuup illoqarfiit pingaarnersaattut illoqarfittullu ineriartortinneqarnissaa ataatsimoorlutik tapersersorpaat.  2. borgmesterip tullia Ane Egede Mathæussen (S) nassuiaateqarpoq:

“Illoqarfimmik ineriartortitsineq illoqarfiullu immikkoortuanik nutaamik pilersitsineq pingaaruteqarluinnarpoq, pissutigalugu Kalaallit Nunaanni Nuummilu ukiuni 40-ni ajornartorsiutit arlaqartut sorsuutigineqarsimasut qaangernissaannut aaqqiissutaaqataasinnaammat. Inuuniarnikkut arlalippassuarnik unammilligassaqarpugut, suliniutip ammaassiffigisinnaassaanik. Meeqqat atuarfii pitsaanerulissapput, nukarliit pitsaanerusumik paaqqutarineqalernissaminnut periarfissaqalissapput, inissiat amerlanerulersissavagut aammalu najukkami ilinniarnermi sungiusarfissanik suliffeqarfissanillu pilersitsissaagut nunalu tamakkerlugu ineriartortitsilluta. Tapersersuinnginneq silatusaarnerunavianngilaq.”

Borgmesteri Asii Chemnitz Narup (IA) siammasissumik tapersersuineq Nuummullu kissaataasut nuannaarutigivai:

“Partiit tamarmik suliap ingerlarnga tamaat assigiimmik sammiveqarlutik anguniagaqarlutillu sulinikuupput, pissutigalugu anguniagaq partiimiit suminngaanneernermiit nalinginnaasumilluunniit suleqatigiinnermiit pingaaruteqarnerulluinnarmat. Kommunimut aammalu illoqarfimmut pingaarnermut takorluukkat kommunalbestyrelsip tamakkiisup tunuliaqutaanissaa, maannakkullu illoqarfimmik inerisaanermik pilersaarummi suliniutit tigussaalluinnartut pillugit aamma tapersersuinissaat pingaaruteqarpoq, pissutigalugu Nuummi innuttaasunut inuuniarnikkut pitsannguissammat Kalaallit Nunaannilu ineriartortitsissalluni. Iliuuseqarnata pisussamillu utaqqiinnarnissaq toqqarsimasinnaagaluarparput. Taarsiulluguli peqatigiilluta iliuuseqarpugut.”