Nuup ineriartortinneqarnera illoqarfinnut allanut aamma iluaqusiissaaq

8. February 2017

Nuup illoqarfittut ineriartortinneqarnerata malitsigisaanik kommunimi illoqarfiit allat aamma iluaquserneqartussaasut borgmesterip sinniisussaa siulleq, Justus Hansen (D) isumaqarpoq.

Nuup kujatinnguani Siorarsiorfimmi illoqarfiup immikkoortortassaamik pilersitsinissaq aamma Nuup illoqarfiit pingaarnersaattut ineriartortinneqarnissaanik suliniut Nuummuinnaanngitsoq iluaqusiissaaq. Tassami taama ineriartortitsinermi kommunimi illoqarfiit allat aamma iluaquserneqartussaassut, borgmesterip sinniisussaata siulliup, Justus Hansenip naatsorsuutigilluinnarpaa:

“Namminersortut Nuummi aningaasaliiniarlutik soqutiginnittut amerlapput. Tamannalu pissutigalugu illoqarfinni allani, Nuup avataaniittuni oqartussat aningaasaataasa atorneqarnissaat periarfissaalluni. Atuarfinnik meeqqallu paaqqinnittarfiinik nutaanik Kommuneqarfik Sermersooq nammineerluni Nuummi sanaartussagaluaruni tamanna sanaartugassanut missigersuutinik, ukiut tulliuttut arfinillit arfineq marlulluunniit tungaannut atugassanik naleqassagaluarpoq. Aningaasaliissutilli piffissamut sivisunermut atugassanngortikkaanni, tamanna kommunimut tamarmut ataatsikkut kivitsinerussaaq tassa aningaasaqarnermut aamma sulisunut pitsaaasumik atugassaqartitsilerluni, Justus Hansen oqarpoq.

Illoqarfittut pingaarneq nukittooq, kommuni nukittooq
Justus Hansen Tasiilami najugaqarpoq. Taanna isumaqarpoq illoqarfiit pingaarnersaat Nuuk nukittorsarneqarpat, tamanna illoqarfinnut Nuup avataaniittunut aamma nukittorsaaqataassasoq:

“Nunatta tamarmi pisariaqartippaa illoqarfiit pingaarnersaat nukittooq. Kommuneqarfik Sermersuumilu illoqarfiit pingaarnersaata nukittunissaa kommunimi illoqarfinnut allanut pingaaruteqarpoq. Akileraarutinit pissarsiarineqartartut amerlanerpaartaat Nuummi akiliutigineqartarput, tamannalu pissutigalugu kommunimi tamarmi innuttaasut pitsaasumik sullinneqarlutik. Tamassumalu peqatigisaanik uangut politikeriusugut innuttagut qinigassartittariaqarpavut soorlu inissianik sanaartornikkut taamaalillutik innuttaasut namminneerlutik toqqarsinnaallugu sumi najugaqarusunnerlutik,” Justus Hansen naggasiivoq.