Sermitsiami allaaserineqartut imaannaanngitsunik kukkunillit

3. April 2017

Sermitsiaq sapaatip-akunnerini kingullerni, Kommuneqarfik Sermersuup Siorarsiorfimmi illoqarfimmik ineriartortitsiniarnera pillugu isornartorsiuinertalinnik allaaserisaqartarpoq. Ajoraluartumik isornartorsiuinerit ilaat eqqoriaanernik kukkusunik tunngaveqarput.

Suliassap tamakkerlugu 4 aamma 5 milliartit koruunit akornanni akeqartussatut ilimagisap, kommunimit akilerneqarnissaa allaaserineqarpoq. Tamanna eqqunngilaq. Suliassap annertunersaa nammineq sanaartornermiit nammineq attartortitsinissamik siunertaqarput. Taamaallaalli atuarfinnut meeqqerivinnut il.il. tunngasortai Kommuneqarfik Sermersuumit akilerneqassapput. Taamaattumik suliassamut tunngatillugu kommunip taarsigassarsiassai 500 aamma 700 millioner koruunit, ukiut 30-t qaangiuppata akilersorneqalissapput. Assersuutitut ukioq mannaannaq sanaartugassanut 240 millioner koruunit atorpai.

Roskilde Universitet-imi ilisimatuup, Ole Helby Petersenip, allaaserisami Storebæltimi qallunaat nunaanni pissutsinut sanilliullugu ikaartarfissuit 30-niit 40-nut amerlassusillit ataatsikkut sananeqarnissaattut akeqarnissaa assersuutigaa. Kisitsisit taakkua qanoq ililluni pissarsiarisimanerai ilisimaneqanngilaq, kisianni suliassami aningaasartuutigineqartussat katillugit ukiut qulit ingerlanerini kommunip sanaartugassanut aningaasartuutissanut missingersuutaasa marloriaataattut amerlatigipput.  Nunatsinnut tunngatillugu aningaasartuutissat taamak amerlatigisussaanngillat.

Sermitsiaq Kommuneqarfik Sermersuumut aningaasalersorneqarnissaanut periarfissat pillugit apeqquteqarsimavoq, kisiannili Ole Helby Petersenip isornartorsiuinera pillugu kommunip allaffeqarfianut apuussisoqarsimanngilaq. Taamaattumik kommunip allaffeqarfiata Tusagassiuuteqarnermut aalajangiisartut, tusagassiornermi ileqqorissaarnissaq matumani malinneqarsimanersoq pillugu nalileeqqullugit qinnuigissavai.