Nuuk illoqarfittut ineriartortinneqarnera: Sermersooq illoqarfimmik ineriartortitsinermi ingerlatseqatigiiffimmik pilersitsivoq

6. September 2017

Kommuneqarfik Sermersuumi Kommunalbestyrelsip Nuup illoqarfittut ineriartortinneqarnissaanik ingerlariaqqinnissaq akueraa – tassunga ilanngullugu illoqarfiup nutaartaanik Siorarsiorfimmik pilersitsinissaq.

Kommunip illoqarfimmik ineriartortitsinermi ingerlatseqatigiiffik kommunimit pigineqartoq pilersippaa. Ingerlatseqatigiiffiup suliassaa tassaassaaq Nuup illoqarfittut inerisarneqarneranik aningaasalersuineq, ineriartortitsineq, piareersaaneq, sanaartorfissagissaaneq, Kommunalbestyrelsip akuersissutigisaatut Nuup Siorarsiorfiullu illoqarfittut ineriartortinneqarneranik sanaartorneq ingerlatsinerlu. Kommuneqarfik Sermersooq ingerlatseqatigiiffinnik allanik pigisaqareerpoq, soorlu Nuup Bussii A/S aamma Iserit A/S.

Illoqarfimmik inerisaanermi pineqarput, inissiat nutaat 1600 (taakkunannga kommunimit 400 pigineqartut), atuarfiit nutaarluinnaat pingasut, atuareernerup kingorna ornittakkat (AKO’t) nutaarluinnaat pingasut, ukioqatigiinngiiaanut meeqqeriviit qulit, Qinngutta Siorarsiorfiullu akornanni aqqusineq, attaveqaatinut tunngasunik allanik inerisaaneq, nunaminertat inuussutissarsiorfiusut, init inuussutissarsiorfiusut kiisalu qulisamik arsaattarfiliornissamut periarfissaqarluni.

Illoqarfimmik inerisaanermi pilersaarut aallaqqaammut ataatsimoortuutinneqarnissaa siunertaagaluarpoq, suliffeqarfiit aningaasaliissuteqartut entreprenøreqarfiillu ingerlatseqatigiillutik suliaqartussanut orniginarsarniarlugu. Illoqarfimmik inerisaanermi pilersaarut maanna angisuunut mikinerumaanullu agguarneqassaaq.

”Angisuutut ataatsimoortunngorlugu neqeroortitsinissaq ajornakusoorpallaarlunilu illoqarfimmik inerisaanermut akitsorsaataasinnaanera nalorninartortaqarpallaarpoq. Nutaamik ilusilerlugu iluanaarnerusinnaavugut, entreprenørit mikisut angisuullu neqeroortissinnaanngorlugit ajornanngippallu allanik ingerlatseqateqartillugit,” Kommuneqarfik Sermersuumi kommunaldirektøri Lars Møller-Sørensen oqarpoq.

”Illoqarfimmik ineriartortitsinermi ingerlatseqatigiiffiliornikkut suliap ingerlanera pilertornerusumik ingerlasinnaanngussallunilu pituttugaavallaannginnerulissaaq. Nuummi atuartut amerliartornissaat maannakkut naatsorsuutigisatsitut issanngikkaluarpat, amerlassusaat naapertorlugu annertusarneqanngikkuni annikillisarneqarsinnaavoq. Ataatsimoortunngorlugu neqeroortitsisoqassappat piffissami sivisuumi aningaasarpassuit atorlugit pituttorsimasoqalersinnaanera nalorninaateqarpoq. Politikerit siunissamut ungasinnerusumut anguniagassaliorlutillu ineriartortitsinissamut pilersaarusiussapput, taava suliassartaanut suliassanullu sukumiisunut tunngasut Illoqarfimmik ineriartortitsinermi ingerlatseqatigiiffimmit isumagineqassapput” taama oqarpoq Lars Møller-Sørensen.

Kommuneqarfik Sermersooq ingerlatseqatigiiffimmut nutaamut 5 millionit koruuninik aningaasaliissaaq, kiisalu taarsigassarsianik akisussaaffigisanik 20 mio. koruuninik aningaasaliiffigineqassasoq.

Tamatuma saniatigut kommunip inissiaqarfii sisamat ingerlatseqatigiiffimmut nuunneqassapput, taakkulu 1,3 milliardi koruuninik nalilerneqarsimapput nalilerneqarsimapput.

Kommunip Illoqarfimmik ineriartortitsinermi ingerlatseqatigiiffiata taaguutaa tassaassaaq ”Siorarsiorfik – Nuuk City Development”.