Apeqqutit akissutillu


Aningaasaqarnikkut kommune qanoq annaasaqaratarsinnaava?

Kommuneqarfik Sermersuup atuarfinnik meeqqerivinnillu attartortuusussaatitaavoq, taamalu Nuummi meeqqat ikileriaateqarpata kommunip atuarfiit imaqanngitsut akiliiffigisariaqalissava: Ukiumut 30 million koruunit missaanni.  Suliniutip sinnera namminersortunit ingerlanneqarpoq, taamalu kommune tassunga atatillugu annaasaqartussaanani.

Pilersaarut ima suliaavoq – atuarfimmik meeqqerivinnilluunniit pisariaqartitsisoqanngippat, taava soorunami pilersaarummiit peerneqarsinnaassapput.

Kina sanaartortuussava?

Ingerlatseqatigiit arlalinnit ingerlanneqartup suliamik suliaqartuussaaq. Taamaalilluni entreprenøri ataasinnaassanngilaq, taamalu najukkami suliffeqarfiit suliaqarnissamut neqerooruteqarnissaminnut periarfissaqassapput.


Kikkut suliniummi sulissappat?

Sapinngisamik suliniummi najukkami nunaqavissunik sulisitsissaaq, tassa sulisut Nuummi Kalaallit Nunaannilu pissarsiarineqarsinnaagunik.

Siorarsiorfimmi qanoq inissarsisoqarsinnaava?

Inissiat assigiinngisitaartuussapput: Kommunip aamma namminersortut inissiaataat attartortittakkat, piginneqatigiilluni inissiat, inissiat nammineq pigineqartut illullu. Kommunip inissiaataani najugaqarusukkuit inissiaatileqatigiiffimmi Iseritimi utaqqisunut allatsissinnaavutit.


Qanoq iliornikkut aningaasaliiffigineqarpa?

Suliniut ingerlatseqatigiiffinnit, pensionskarsinit, aningaasaliiffigineqassaaq. Aningaasaliinerpaasartunut, suliniummut aningaasaliinissaminnut pisariaqartitsinngikkaluartunut soqutigineqalerniassammat, suliniut Kalaallit Nunaanni ingerlanneqarsimasut annerpaartaraat.

Sooq akiitsoqalissaagut?

Suliniut inuiaqatigiit aningaasaqarnerannut ineriartuutaassaaq. Inuiaqatigiit aningaasaqarneranni misissuinerni takuneqarsinnaavoq, suliniut aqqutigalugu ukiuni tulliuttuni 40ni, suliniut kisiat pissutigalugu, ukiumut minnerpaamik procentinik marlunnik ineriartuutaassasoq. Tamanna nalinginnaasumik inertornermiit, soorlu Danmarkimiit, annertunerusumik ineriartuaarneruvoq. Taamaattumik akiitsoqalerneq isumatusaarneruvoq.


Kalaallit Nunaata sinnerami?

Nuummi aningaasaliinikkut Namminersorlutik Oqartussat sinerissami sanaartugassanut amerlanerusunut aningaasaliinissamut salliussinissaat periarfissaqalissaaq, tassa Nuup avataani aningaasaqarnikkut ineriartortitsinissamut periarfissaqassaaq.

Tamatuma saniatigut Nuummi ineriartorneq Kalaallit Nunaata sinneranut ineriartuutaanissaa pingaaruteqarpoq.

Taamatuttaaq Kommuneqarfik Sermersooq Ittoqqortoormiinut, Tasiilamut Paamiunullu sanaartornissamut aningaasaliissutinik amerlanerusunik immikkoortitsinissamut periarfissaqalissaaq.

Kommunimmi sinnerani?

Kommuneqarfik Sermersooq 2017imut missingersuutini 240 million koruunit sinnerlugit sanaartugassanut immikkoortitsivoq. Tassa imaappoq, Kommuneqarfik Sermersooq Tasiilamut, Paamiunut, Ittoqqortoormiinut nunaqarfiinullu suli aningaasaliissuteqartassaaq.


Sooq avataaniit aningaasaliisartut aningaasaqarnikkut iluanaaruteqassappat?

Isumatusaarneruvoq. Suliniummut aningaasanik taarsigassarsisitsigaanni, isumatusaartumik niuernerusoq naatsorsuutigineqartariaqarpoq. Akerlianillu Nuuk, illoqarfimmut ineriartuutaasunik, arlalinnik peqalissaaq. Tamanna tamanut iluanaarutitaqarpoq, aningaasaliisut arlallit iluanaaruteqarluassapput, saniatigullu Nuummi Kalaallit Nunaannilu ineriartortitsisoqassaaq.

Siorarsiorfimmi najugaqarneq qanoq akisutigissava?

Tamanut inissianut ineqarnermut akit, Nuummi illoqarfiup immikkoortuini maanna ineqarnermut akit assigissavai. Inissiani nutaani kiassarnermut aningaasartuutit akikinnerunissaat naatsorsuutigineqarpoq.


Qanoq ilillunga illoqarfiup qeqqanukartassaanga?

Siorarsiorfik tamanut angallannermut atassuteqaaserneqassaaq.

Sooq Nuuk taamatut periarfissinneqassava, Nunatta sinnera taamatut periarfissinneqanngitsoq?

Kommunit allat kommunip illoqarfiinut kommunimulluunniit nalinginnaasumik assingusunik periusissiorniarpata, Kommuneqarfik Sermersuumit tamakkiisumik taperserneqassapput.


Siorarsiorfimmi ooqattaasarpunga. Taava maanna qanoq iliussaanga?

Ooqattaasartarfimmik pilersitsinissaq Siorarsiorfiup ineriartortinnissaanut pilersaarutinut ilaavoq.

Sooq Ukkusissat sullorsualiorfigalugu qaartiterpisiuk?

Illoqarfiup immikkoortortaani pioreersuni inissialiornissamut nunaminertanik nassaarnissaq ajornakusoormat. Siorarsiorfik sanaartorfigineratigut inuit 5000it inissaqalissapput, maanna tamanna najugaqarfigineqanngimmat. Taamaalilluni Nuuk siunissamut qulakkeerneqarnissaanut iluaqutaaqataassaaq.


Qaqugu immikkoortortap sanaartorfigineqarnera naammassineqassava?

Inissiat 1600-t ukiut arfineq-pingasut qaangiuppata naammassisimanissaat naatsorsuutigineqarpoq. Illoqarfiup immikkoortortaa nutaap ataatsikkut suliarineqarneranut pitsaaqutigissavaa, innuttaasut siulliit inissianut nuuppata, atuarfik meeqqeriviillu naammassereersimassammata.

Sooq arsaattarfimmut aningaasanik atuissaagut?

Kalaallit Nunaani qulisalimmik arsaattarfiliornikkut, Kalaallit Nunaanni nutaaliaanerpaamik timersortarfimmik pilersitsinissaq kisimi siunertaanngilaq. Arsaattarfik siunissami assersuutigalugu tusarnaartitsivissuartut atorneqarsinnaasassaaq.


Nuuk kalaalerpalukkunnaassava?

Nuuk tassaavoq nunarsarmi illoqarfik kalaallinit amerlanerpaanik innuttaasulik, taamaaginnassaarlu. Illoqarfik kalaallit ileqqutoqaanut aamma nalitsinni kalaallinut ilinniagaqarluarsimasunut inissaqarpoq.

Nuummi najugaqartussanut tamanut suliffissaqassava?

Siorarsiorfiup pilersinneqarnera Nuummi suliffissanik pilersitsisuuvoq. Sanaartornermi atortut najukkami suliarineqassapput. Maanna Nuummi suliffinni tamani sulisunik piukkunnaateqarluartunik amigaateqarpoq, taamaattumik sulisinnaasut amerlineri suliffissaaleqisullu ikilineri pitsaasuupput.